38 / 108
Fokus
Bemesting
O
m ‘n opbrengs van 11,47 t/ha met sojabone te realiseer,
klink vir die meeste produsente onmoontlik, maar die
Amerikaner, mnr Randy Dowdy, het dit reggekry. Elim
Kunsmis het hom uitgenooi om nie net sy suksesverhaal
nie, maar ook sy wenresep, met Suid-Afrikaanse produsente in
verskillende dele van die land te kom deel.
Aan die einde van Mei vanjaar het produsente van regoor die
land inligtingsessies, wat geborg is deur Graan SA, Brandt Smart
System, AfriKelp, Roundup PowerMAX en
Landbouweekblad
,
bygewoon. Belangstellendes het op Winterton in KwaZulu-Natal,
Bethal in Mpumalanga, Potchefstroom in die Noordwes Provinsie
en Koedoeskop in Limpopo gaan uitvind wat die boerderypraktyke
van dié dubbele wêreldkampioen is.
Hierdie groot man met sy ewe groot persoonlikheid is tans die
wêreldrekordhouer vir sojabone met 11,47 t/ha, maar was in 2014
ook die wêreldrekordhouer vir mielies met 31 t/ha.
“Paying it forward”
Dowdy is ‘n eerstegenerasieprodusent in Valdosta, Georgia. Al het
hy klein begin, strek sy plase, Dowdy Farms, nou oor ‘n groot gebied
van Georgia tot in Florida. Hy het besluit om nooit suinig te wees
met sy kennis nie, omdat hy as beginnerprodusent baie hulp
ontvang het van bure, medeprodusente en ander kundiges.
“Ek glo in die konsep van ‘paying it forward’,” sê hy. As gevolg
van dié besluit het ‘n groot aantal Suid-Afrikaanse produsente ook
daarby gebaat. Hy doen meer as 100 praatjies per jaar en sê dat
dit vir hom baie opwindend is om te deel in die sukses van iemand
wat sy advies ter harte neem.
Die opstel van rekords en die wen van opbrengskompetisies is
egter nie waarop hy fokus nie. Vir hom is volhoubare produksie van
groter belang en hy fokus op opbrengs op belegging. Omdat hy
egter kompeterend van aard is, geniet hy kompetisies en is sy suk-
ses een van die gevolge van dié karaktereienskap.
Hy is analities – ‘n kritiese denker wat sy produksiepraktyke in ver
skillende produksiegebiede én wisselende groeitoestande van
Amerika opgedoen het deur waarneming. Die feit dat hy sonder enige
kennis oor boerderypraktyke begin boer het, het beslis bygedra
tot sy suksesverhaal, vertel hy. Dit was vir hom uiters belangrik
om die wetenskap agter produksiepraktyke wat toegepas word,
te verstaan. Hy het dus bly vrae vra en só by een van sy mentors
geleer dat ‘n magdom inligting ontsluit word deur die regte vraag
te vra.
Die Skrifgedeelte “Beproef alle dinge en behou die goeie” pas
perfek in by sy metodiek. “‘n Mens kan nie dieselfde ding oor en
oor doen en ‘n ander uitkoms verwag nie,” het hy produsente
gemaan. Volgens hom groei talle familieboerderye nie omdat jong
produsente nie nuwe produksiepraktyke in die boerdery inkorpo-
reer nie.
Hy meen dit is goed om voort te bou op metodes wat oor jare
toegepas is, maar met tegnologie wat met rasse skrede toeneem,
kan ou praktyke ook beperkings op die boerdery plaas. “Produsente
het niks om te verloor deur nuwe dinge te toets nie. En as jy onseker
voel daaroor, vra net die regte vraag,” het hy sy goeie raad gedeel.
Op Dowdy Farms word presisieboerdery toegepas om die impak
van beperkende faktore soos klimaatstoestande te verminder.
Altesaam 70% van sy ongeveer 8 100 ha bewerkbare grond is
onder besproeiing. Hy gebruik ‘n wisselboustelsel waar mielies met
sojabone en ertjies afgewissel word. Ander produksiepraktyke wat
bydra tot sy sukses, is dat die risiko’s versprei word deur die gebruik
van verskillende saadmaatskappye se produkte. Strookbewerking
en minimumbewerking word toegepas en plantvoeding sowel
as kunsmis vorm ‘n belangrike deel van sy bestuursprogram.
Om gedeeltes van Dowdy se aanbiedings tydens sy besoek aan
Suid-Afrika te sien, gaan na:
https://youtu.be/y1u8FrXLA9k
.
Fokus op wortelontwikkeling
Mnr Thomas Strydom van Sion Agri het tydens die geleentheid in
Potchefstroom meer vertel oor die onafhanklike navorsing wat met
behulp van AfriKelp en Brandt onder Suid-Afrikaanse toestande op
soja en mielies gedoen is. Hy hoop om produsente met dié proewe
te help om ‘n hoër wins per hektaar te behaal.
Hy het onder andere verduidelik waarom dit belangrik is om op
wortelontwikkeling te fokus sodat plante in strestoestande makliker
kan oorleef. “Jy kan net besluite neem as jy weet wat fout is, so
probeer uitvind wat jou opbrengs beperk,” het hy gesê, en produsen
te aangemoedig om blaarmonsterneming te laat doen.
Mnr Sarel van Rensburg van Northwind Trading het produsente inge-
lig oor die belangrikheid van kalk vir die ontwikkeling van plantwor-
tels. Hy het uitgebrei oor die impak wat die gebruik van MicroLife
Kalk en gipskorrels op mielies en sojabone het deur getuienisse en
stawende foto’s van verskeie produsente te bespreek.
Amerikaner deel
topwenke
met SA-produsente
Produkinligting
Louise Kunz,
SA Graan/Grain
redaksiespan
Julie 2018
36
Meer as 300 produsente het die inligtingsdag in die Snowflake-gebou in
Potchefstroom op 30 Mei bygewoon. Die sprekers was Sarel van Rens-
burg, Thomas Strydom, Randy Dowdy en Izak le Roux, hoof uitvoerende
beampte van Elim Kunsmis.