SA Graan Mei 2016

70 / 72

68
Beste Grootneef
d it lyk of enigiets deesdae te koop is. Van ‘n Kabinetspos
tot ‘n tolhek. ‘n Stukkie Prasa-lokomotief of ‘n lekker
sappige tender is ook nie te versmaai nie.
Ons Suidland se geskiedenisboek raak nou só vol klad-
merke van floppe en ooreenkomste onder die tafel
deur, dat jy sukkel om die teks te lees. Die storielyn het so 20 jaar
terug nog ‘n klokkie gelui van ‘n beter lewe vir almal, met ‘n veilige
hawe vir ‘n ieder en elk. Nou lyk dit of almal gelyk is, maar dat
sommige mense meer gelyk is as ander, alias oom George Orwell.
Maar die storielyn word al hoe moeiliker om te lees. Dit is asof die
bak vir dié wat niks het om te verloor nie, al hoe swaarder weeg.
En die skaal afswaai na waar vrees vir ‘n brandende band groter
gewig dra as respek en die reg.
Van ‘n doktorsgraad tot ‘n visgraat is nou te koop. Ek lees in die
dagblad dat jy selfs die dienste van ‘n “profeet” kan aankoop om
te help met alles onder die son – van jou verstandtande wat uitval
tot die perd waarop jy moet wed. Wenke oor jou
liefdeslewe is by die fooi ingesluit. En dié man
moet ‘n bestaan maak, sy advertensie is immers
week na week op dieselfde plek!
Ou Neef, ons kort só dringend ‘n hand vol
hoop. Net so bietjie, om almal weer te laat moed
skep. Net een vrou wat kan opstaan en sê dat
sy nie “geGupta” is nie. Of het ons almal al so
afgestomp geraak oor wat reg en verkeerd is,
dat niemand meer by ‘n stopteken stop nie?
Die moeilikheid is dat mense wat goed afbrand
en beelde in visdamme gooi, bome se takke
afbreek en klippe deur ruite slinger, niks het om
te vrees nie. En bewaar jou as jy met jou bakkie
deur ‘n optog by die koöperasie moet uitkom.
Die spaarwiel en draadloos se aerial is nou nog
soek. Wat pla is dat wanneer die stof na die
optog gaan lê en die rook uit die afgebrande
gebou trek, daar geen gevolge is vir die hand
wat die petrolbom gegooi het nie. Niemand
word aangekla omdat hulle kultuurgoed verniel
nie. Het Hitler se bruinhemde nie ook skilderye
verbrand nie?
Die resultaat is dat die kwaad deursuur. Want
as een taxi soos die duiwel oor geel strepe
jaag en die “spietkop” hom nie vang nie, begin die res van die
karre om ook met dieselfde aggressie en domastrantheid bane te
wissel, maak nie saak wie die reg van weg het nie. En só gebeur
dit dat selfs gemoedelike mense wat Sondae na kerk tee skink, in ‘n
aggressiewe bondel agter ‘n stuurwiel verander.
Buurman se wens is eenvoudig maar gewigtig. Dat die klomp wat
staak, dit net so doen dat hy met sy lewe kan aangaan. Die donker
spook van intimidasie is egter los. Gemoedelike samesyn word
verweer met intense wantroue – tot op die kleinste ou dorpie.
Ou Neef, nou moet ons hakke inskop met matelose geduld, om
werklik te luister en te hoor; om daar waar dit moontlik is, ‘n
verskil te maak. Elke goeie daad bou ‘n langtermynverhouding.
Een kwaadwillige aksie vernietig egter in ‘n oogwink ‘n leeftyd se
welwillendheid.
Groete op die Oosgrens. Hou 90 en hou links!
Kleinneef
E-POSSE
aan Groot neef
‘n Tolhek te koop
Lesers is welkom om ‘n e-pos aan Kleinneef te stuur by .
Mei 2016