91 / 108
89
July 2017
Daar is ‘n groot verskeidenheid van teleskope op die mark.
Kies ‘n teleskoop wat geskik is vir jou doel en wat jou begroting
pas. Die enigste advies wat ek kan gee, is om die beste kwaliteit
volgens jou begroting te koop en te verseker dat dit ‘n handels-
merk is wat behoorlike naverkoopdiens kan lewer.
Met die montering van die teleskoop moet op die volgende gelet
word:
Verseker dat jy goeie kwaliteit en die korrekte monterings vir
die geweer koop. Swak kwaliteit en die verkeerde monterings
kan jou duur te staan kom as jy nie jou geweer ingeskiet kry nie.
Die basisse en ringe moet met die korrekte toerusting geïnstal-
leer word om te verseker dat die skroefkoppe nie beskadig word
nie en moet ook met die korrekte wringkrag vasgedraai word.
Dit sal verseker dat daar nie drukmerke op die teleskoop ver-
oorsaak word nie.
Die installeerder moet ook verseker dat die ringe met mekaar in
lyn is, asook in lyn is met die loop. Indien die loop en teleskoop
nie in lyn is nie, sal jy nie in ‘n reguit lyn oor verskillende afstan-
de kan skiet nie.
Heelwat ringe vereis ook dat die installeerder dit bietjie skuur
sodat die teleskoop presies in die ringe pas. Indien die teleskoop
nie presies in die ring pas nie, sal die ring merke op die tele-
skoop laat wanneer dit vasgemaak word. Dit kan veroorsaak
dat die teleskoop se parallaks vasgedruk word en ook merke op
die teleskoop se buis maak. Foutiewe installering van teleskope
word nie gedek onder die teleskoop se waarborg nie en kan
jou dus duur te staan kom.
Die installeerder moet ook verseker dat die teleskoop gemaklik
vir jou oog sit en dat die teleskoop se hoogte korrek is.
Laastens moet jy verseker dat die teleskoop se kruishaar
waterpas met die geweer is. Dit is baie belangrik as jy op verder
afstande skiet, omdat jy nie in ‘n vertikale lyn gaan skiet as die
kruishaar skeef is nie.
As jy na al hierdie punte omgesien het, kan jy uiteindelik jou
geweer skietbaan toe vat, maar daar is nog ‘n laaste stap om
met ‘n nuwe geweer te volg: ‘n Inskietproses. Hierdie stap is van
toepassing op alle nuwe gewere en lope. Die meeste vervaardi-
gers sal hierdie proses in die inligtingsbrosjure of op hul web-
tuiste beskryf.
Hierdie proses verskil van vervaardiger tot vervaardiger, maar kom
op die volgende neer:
Maak die geweerloop behoorlik skoonmaak voordat jy die eerste
skoot skiet.
Nadat die eerste skoot geskiet is, moet die loop weer behoorlik
skoongemaak word. Die hoeveelheid skote wat jy moet skiet
en hoeveel keer jy dit moet herhaal, sal deur die vervaardiger
voorgeskryf word.
Tydens hierdie proses moet jy baie goeie skoonmaaktoerus-
ting gebruik; dit is immers ‘n nuwe geweer en jy wil nie jou loop
of kroon beskadig met swak toerusting nie.
Gebruik goeie skoonmaakprodukte gebruik: Nitrosellulose-
oplosmiddel om die gebrande kruit uit die loop te haal en ‘n
koperoplosmiddel om die koperneerslae van die punt in die loop
op te los en dan ‘n goeie olie om die loop mee te smeer.
Hierdie inbreekproses sal jou loop glad maak en alle masjienmerke
wat tydens die vervaardiging gemaak is, uitskakel. Dit sal die
geweer se looplewe verleng en ook toekomstige skoonmaak van
die wapen vergemaklik.
As jy hierdie stappe met jou nuwe geweer gevolg het – of selfs ‘n
ou geweer wat jy wil vernuwe – sal jy ure se skietgenot daaruit kry.
Vir meer inligting, kontak FJ Lessing by 018 462 5712 of
fj@centralarms.co.za.
Graan SA/Sasol fotokompetisie
– Molly Bester 2011
Laat jou teleskoop deur ‘n bekwame persoon
monteer. Jy moet ‘n teleskoop kies wat geskik is
vir jou doel en wat jou begroting pas.