81 / 84
79
Die begin van opwindende
nuwe verwikkelinge
h
yundai Automotive SA se reeks handelsvoertuie het
pas ‘n hupstoot gekry met die bekendstelling van
die nuwe EX 8 Mighty wat die vorige Hyundai HD-
vragmotorreeks vervang.
Hierdie nuweling spog met ‘n aantal nuwe kenmerke en
die beste waarborg in sy klas. Hy word in Hyundai se monteeraanleg
in Benoni aan die Gautengse Oos-Rand vervaardig en sluit hom by
die H 100-bakkie en die H1-paneelwa, as deel van dié maatskappy se
reeks handelsvoertuie, aan.
In vergelyking met die HD is die Mighty se binneruim van 2,9 m
2
na 3,5 m
2
vergroot, terwyl die voorruit ook groter is om uitsig
na buite te verbeter. Die sitplekke kan ook verder agtertoe as
voorheen geskuif word. Die kanttrappe, wat nie gesien kan word
wanneer die deure toe is nie, is ook nou groter om dit makliker te
maak om in of uit die kajuit te klim. Daar is verskeie tipes laaibakke
om van te kies, onder meer ‘n toe bak vir die veilige vervoer van
goedere, asook ‘n wipbak. Die valkantbak wat standaardtoerusting
is, maak dit makliker om goedere op en af te laai.
Die nuwe dieselenjin met ‘n verplasingsinhoud van 3 907 cc voldoen
aan Euro 3-besoedelingstandaarde en het ‘n vyfgang-handratkas
as standaardtoerusting. Dié enjin lewer 103 kW teen 2 800 opm
en wringkrag van 373 Nm teen 1 600 opm. Die duursaamheid
en betroubaarheid van Hyundai se enjins het die maatskappy in
staat gestel om ‘n waarborg van vier jaar, ongeag die kilometeraf-
stand, te bied. Die maatskappy bied ook padbystand van drie jaar of
200 000 km. Hyundai Automotive SA word ook dadelik in kennis
gestel sodra een van sy voertuie ingesleep word. Dit verseker dat die
handelaars die voertuig so vinnig as moontlik weer op die pad kry.
Die maatskappy ondersoek ook die moontlikheid om verskeie
nuwe modelle, soos die groter H 350-paneelwa en bus, bekend
te stel en om ‘n outomatiese ratkas vir die Mighty beskikbaar
te stel.
Volgens mnr Wade Griffin, die direkteur van handelsvoertuie van
Hyundai Automotive SA, is die Mighty die begin van opwindende
nuwe verwikkelinge. Hy word gerugsteun deur 40 handelaars
en 37 dienssentra wat regoor die hele land, asook in Botswana,
Swaziland, Zimbabwe en Namibië, geleë is. Dit verseker dat al
die belangrike roetes in Suider-Afrika gedek word. Verder sê hy
dat die bekendstelling van die Mighty plaasvind in ‘n tyd wanneer
Hyundai uiters optimisties is oor die toename in die verkope van
handelsvoertuie wat binne die volgende vyf jaar plaas behoort
te vind.
Hyundai se monteeraanleg is in 2014 geopen en produksie is in
volle swang. Op die oomblik kan meer as 400 eenhede van die
EX 8 Mighty en die H 100-bakkie vervaardig word. Daarby kan die
aanleg ook ombouings na aanleiding van klante se behoeftes uitvoer
– wipbakke en toe paneelwabakke kan onder meer vir die voertuie
aangebring word.
“Hyundai streef daarna om sakelui te ondersteun om hul on-
dernemings te laat groei deur aan hulle handelsvoertuie van
hoogstaande gehalte, wat aan hul spesifieke behoeftes voldoen,
te bied. Ons bied duursame voertuie teen billike pryse, met lang
waarborge vir gemoedsrus en lae loopkoste,” sê Griffin.
Die EX 8 Mighty-reeks se pryse, sonder BTW, is soos volg:
EX 8 Mighty LWB (onderstel en kajuit): R379 500
EX 8 Mighty LWB (onderstel en kajuit met lugversorger):
R413 100
EX 8 Mighty valkant: R413 100
EX 8 Mighty valkant met lugversorger: R428 100
EX 8 Mighty wipbak: R451 500.
GERRIE SMIT,
lid van die SA Motorskrywersgilde
WIELE
vir die plaas
Mei 2018
Die nuwe Hyundai EX 8 Mighty.