SA Grain November 2017

59 / 84

Klante registreer fluks vir
lojaliteitsprogram
Sedert die NWK-landboudienstegroep sowat ‘n maand
gelede ‘n lojaliteitsprogram van stapel gestuur het, het
klante flink hierop gereageer. Die registrasieproses vorder
vinniger as wat verwag is en deelnemende klante het
gevolglik reeds begin om lojaliteitspunte te verdien.
Die program se mikpunt is om lojale klante met aandele óf krediet
vir verdere aankope te beloon en om klante aan te moedig om hul
landbousake aan die groep toe te vertrou. Dit skep inderwaarheid
‘n wen-wensituasie, want klante verdien ‘n bykomende voordeel,
terwyl NWK ekstra besigheid genereer en kan voortgaan om ‘n
wesenlike rolspeler in die landbougebiede van veral die Noordwes
Provinsie te wees.
Volgens mnr Francois de Kock, bestuurder: NWK Finansiering, is
produsente se reaksie op dié terugploegstrategie geweldig positief.
Dit is die terugvoer wat tydens ‘n reeks inligtingsvergaderings
met produsente in Augustus, asook tydens die algemene
jaarvergadering in September, ontvang is.
“Uit gesprekke met produsente wat direkte navraag by Finansiering
doen, is dit duidelik dat landbouklante wat NWK vantevore by
geleentheid ondersteun het, nou twee keer dink, want hulle weet hul
kan lojaliteitspunte verdien,” het hy gesê.
Ook die handelsdivisie kry goeie terugvoer van kommersiële en
ontwikkelende produsente. “Heelwat nuwe moontlikhede vir
primêre insetbesigheid het al na vore gekom weens die lojali-
teitsprogram. Klante wat nie altyd hul primêre insette deur ons
aangekoop het nie, kontak nou ons verteenwoordigers vir kwo-
tasies,” vertel mnr Jacques de Wet, bestuurder: Aankope- en
Bemarking, NWK Handel.
Geen registrasie, geen punte
Aangesien registrasie per entiteit ‘n voorvereiste vir deelname aan
die program is, is dit ‘n hekkie wat alle klante – dus produsente,
aandeelhouers, sake-entiteite, die algemene publiek of personeel
– moet oorkom. Elke entiteit wat punte wil verdien, ongeag of dit ‘n
individu, beslote korporasie, vennootskap, maatskappy of trust is,
moet afsonderlik geregistreer word.
Klante vra dikwels of die registrasieproses en die FICA-inligting
werklik nodig is. “U as klant se inligting moet deur die FICA-proses
geverifieer word omdat ‘n potensiële voordeel van die program
aandele in die groep is, waarop dividende verdien kan word. Dit is
ook belangrik om ‘n sekuriteitsmaatreël in plek te hê sodat ‘n klant
se wagwoord geverifieer kan word,” aldus Francois.
‘n Ligpunt vir klante wat nog nie geregistreer het nie, is dat dit
net eenmalig gedoen hoef te word. Huidige klante van NWK het
die voordeel dat bestaande inligting op die stelsel reeds op die
registrasievelde vertoon. Dit is dus net nodig om die inligting se
korrektheid na te gaan en ontbrekende inligting in te vul.
Hulp met registrasie
Klante wat probleme ervaar met die aanlynregistrasie of wat nie
toegang tot die internet het nie, kan hulle ore en oë oophou vir
doelgerigte registrasiedae by bedryfspunte van November dié jaar
tot April volgende jaar. Konsultante van NWK Finansiering sal dan
op hul pos wees om klante by te staan om te registreer. Dieselfde
diens sal ook tydens boeredae, ekspo’s en inligtingsvergaderings
beskikbaar wees. Intussen kan klante ook by hul naaste bedryfs-
puntbestuurder aanklop vir hulp met registrasie.
Die webtuiste bevat ‘n volledige stel vrae en
antwoorde oor die program. Sien die kassie onder vir ‘n stap-vir-
stapverduideliking van hoe om te registreer. Onthou, hoe meer sake,
hoe meer punte. Kontak NWK Finansiering gedurende kantoorure by
018 633 1000 vir verdere navrae.
57
November 2017
OP PLAASVLAK Geldsake
Produk-inligting
JOHAN BEZUIDENHOUT, groepbestuurder: Korporatiewe Bemarking en Kommunikasie, NWK
Registreer en kry meer
Enige NWK-klant kan by die lojaliteitsprogram inskakel. Volg dié stappe:
Kies die “registreer”-skakel op die NWK-webtuiste se tuisblad, op die spesiale webtuiste
óf op die NWK Online-toepassing.
Vul die verpligte velde (gemerk met rooi sterretjies) volledig in.
Lees en aanvaar die terme en voorwaardes en kies die “dien in”-skakel onderaan die bladsy.
As dit volledig ingevul is, sal ‘n groen strepie verskyn met die boodskap: “U aansoek is suksesvol ingedien”.
Sodra die aansoek verwerk is, sal u per sms deur NWK Finansiering daarvan in kennis gestel word.
Al u rekeninge by NWK sal dan aan die Lojaliteitsprogram gekoppel wees, sodat punte op alle handel-
en graanleweringstransaksies verdien kan word.