14 / 84
November 2017
12
Room van graanprodusente
word vereer
“D
it wat ons vanaand hier ervaar, wys die vordering
wat oor jare en dekades in die landbousektor gemaak
is. Die vlak van voedselsekerheid wat ons in hierdie
land geniet, is prysenswaardig en iets waarop ons
geweldig trots moet wees.”
Met hierdie woorde het mnr Antonie Delport (besturende direk-
teur, Syngenta Suid-Afrika) sy toespraak by die Graan SA-toe-
kenningsgeleentheid ingelei, waar hy die wenners en finaliste
in die vyf verskillende kategorieë met hul prestasies geluk ge-
wens het.
Syngenta was die hoofborg van die aand en borg van die Graan-
produsent van die Jaar- en Kleinskaalboer van die Jaar-toekennings.
“Elke dag is daar 200 000 meer monde op die planeet om te
voed. Daar kan daarom nie bekostig word om slegs ‘n druppel
in die spreekwoordelike voedselproduksie-emmer te gooi nie.
Daarbenewens woon meeste van die 200 000 mense in stede
óf hul sal in die toekoms na stede verhuis, waar hulle nie hul eie
kos kan produseer nie. Ons het derhalwe geen ander opsie as om
nog slimmer te boer nie – soos die Graanprodusent van die Jaar-
finaliste wat tegnologie gebruik om uitdagings te oorkom en op
die kleinste detail fokus, maar steeds ‘n geïntegreerde, holistiese
benadering tot groei het,” het Delport verduidelik.
Verder het hy gesê dat almal daarna moet streef om die maksimum
genetiese potensiaal van hul plante te ontsluit, om sodoende genoeg
kwaliteit gewasse met die beperkte aantal hulpbronne beskikbaar,
te produseer.
Aan die hand van ‘n Albert Einstein-aanhaling (“As jy dit nie een-
voudig kan verduidelik nie, dan verstaan jy dit nie goed genoeg
nie”) het Delport verduidelik dat almal eenvoud moet nastreef om
sodoende spoed en impak te verhoog. “Indien ons dit nie gaan doen
nie, sal ons nie kompeterend bly nie,” het hy gesê.
Konsolidasie regdeur die waardeketting het ‘n algemene gesig
geword – veral aan die gewasbeskermings- en saadkant. “Indien jy
in die waardeketting wil deelneem, maak seker jy voeg waarde toe.
Anders sal jy nie oorleef nie.”
Delport het beklemtoon dat landbou vandag leiers – veral jong leiers
– meer as ooit tevore nodig het. “As jy ‘n jong leier is, het jy die
energie. Jy bring nuwe idees en ‘n vars perspektief na die tafel en
is meesal bereid om ‘n paar risiko’s te neem om die status quo te
breek. Jy het volop potensiaal – moet dit nooit vergeet nie.”
Volgens Delport het ware leiers die vermoë om empatie met ander
te hê. “Indien ons die ander party se gedagtes en ervarings deel en
hul verwysingsraamwerk verstaan, sal ons in ‘n baie beter plek wees
om die gemeenskaplike belang te identifiseer.”
Hy het Graan SA bedank vir die jarelange vennootskap met
Syngenta en gesê hul sien uit na die voortsetting van die borgskap.
Mnr Derek Mathews (visevoorsitter, Graan SA) het in sy verwel-
komingstoespraak die Minister van Wetenskap en Tegnologie,
Naledi Pandor, bedank vir die positiewe werksverhouding wat
Graan SA met haar departement kan hê en dat die organisasie
uitsien om voort te bou op hierdie verhouding.
Mathews het al die 2017-wenners en finaliste se stories opgesom
met ‘n aanhaling van James Douglas Junior: “Our deep respect
for the land and its harvest is the legacy of generations of farmers
who put food on our tables, preserved our landscape and inspired
us with a powerful work ethic.”
Funksie gee erkenning, inspireer en skets
Suid-Afrikaanse landboubeeld
Mnr Jaco Minnaar (voorsitter, Graan SA) het kortliks verduidelik
waarom hierdie Graan SA-toekenningsfunksie, wat vanjaar vir die
18de keer aangebied is, so belangrik vir die landbousektor is.
“Eerstens gee Graan SA en die borge erkenning aan die mededin-
gers in die kompetisie, wat leiers in hul omgewings is. Dit is belangrik
om aan die finaliste en wenners erkenning te gee vir die harde werk
wat hulle in hul boerderye insit.
“Tweedens is die kompetisie ‘n inspirasie vir die jonger mense, wat
die finaliste en wenners as mentors en leiers in hul gemeenskappe
sien.
“Laastens is dit ‘n vertoonvenster vir landbou in Suid-Afrika,
waar ons wys wat die landbousektor bereik – ten spyte van al
die uitdagings en negatiewe faktore wat produsente daagliks in
die gesig moet staar,” het hy verduidelik.
GRAAN SA
Toekenningsgeleentheid
RUTH SCHULTZ,
SA Graan/Grain
medewerker
Vrystaat kraai koning met 2017-toekennings
Graan SA/Syngenta Graanprodusent van die Jaar:
AC van Wyk (Vrystaat) – Bladsy 14
Graan SA/Absa/John Deere Financial Nuwe Era Kommersiële Boer van die Jaar:
Edwin Mahlatsi (Vrystaat)
– Bladsy 16
SPLINTERNUWE KATEGORIE! Graan SA/Monsanto Potensiële Kommersiële Boer van die Jaar:
Paul Malindi
(Vrystaat) – Bladsy 17
Graan SA/Absa/John Deere Financial Bestaansboer van die Jaar:
Mavis Hlatshwayo (Mpumalanga) – Bladsy 17
Graan SA/Syngenta Kleinskaalboer van die Jaar:
Thembalihle Tobo (Oos-Kaap) – Bladsy 18
Inspirasietoekenning:
Janes Barnard (Vrystaat) – Bladsy 18