99 / 150
2015
89
G
RAANGIDS
Riglyne vir die verantwoordelike
gebruik van plaagdoders
Ons as landbouers moet landboumiddels of plaagdoders verantwoordelik gebruik. Soveel so dat
ons genoegsame, veilige en bekostigbare kos en vesel vir die land kan produseer sonder om die
gesondheid van mense en die omgewing aan te tas. Daar is ‘n hele trop anti-plaagdoderbrakkies
wat kef-kef oor die produsente en hoe hulle alles vergiftig, maar hulle kan selde of ooit die bewyse
vir hul aantygings op die tafel plaas. Hier is bietjie hooi om aan te kou en ja, sommige daarvan
sal maklik verteer, terwyl ander weer baie kouwerk sal vereis. Ek noem dit die tien gebooie van
verantwoordelike plaagdodergebruik:
1. Beplan jou produksieseisoen noukeurig en koop slegs die plaagdoders en volumes aan wat
jy definitief gaan benodig. As die agent iets teen ‘n goedkoop prys aanbied en jy sulke on-
nodige produkte aankoop, gaan dit net opgaar.
2. Koop slegs geregistreerde plaagdoders vanaf erkende handelaars aan, dit wil sê agente
wat aan CropLife Suid-Afrika se ledemaatskappye verbonde is, ten einde te verseker dat dit
goeie kwaliteit en wettig is. As ‘n plaagdoder nie ‘n registrasienommer op die voorste paneel
van die etiket bevat nie, is dit onwettig in Suid-Afrika. Só ‘n registrasienommer begin met ‘n
hoofletter L gevolg deur vier syfers (byvoorbeeld L1234) en daarna Wet Nr. 36 van 1947.
3. Berg jou plaagdoders in ‘n ordentlike stoorplek wat mure, ‘n dak, ventilasie, beligting en
toesluitbare deure het. Baie kwaadwillige vergiftigings vind plaas met landboumiddels wat by
produsente gesteel word en dikwels is dit die produsent se eie diere wat daarvan vrek.
4. Bestudeer die etiket van elke landboumiddel sorgvuldig en wend dit streng volgens die voor-
skrifte aan. Regulasie Nr. R1716 van 26 Julie 1992 waarsku dat die gebruik van ‘n landbou-
middel vir enige doeleinde of op enige wyse anders as dit wat die etiket aandui, ‘n strafbare
oortreding van Wet Nr. 36 van 1947 is.
5. Verskaf basiese opleiding aan jou plaaswerkers oor die veilige en verantwoordelike gebruik van
plaagdoders. Dit sal tot meer effektiewe en verantwoordelike gebruik asook beter produksie lei.
6. Dra beskermende klere, soos byvoorbeeld ‘n gesigmasker, ‘n laphoed, lang moue, ‘n lang-
broek en handskoene wanneer plaagdoders gemeng en aangewend word (dit geld ook vir
die trekkerdrywer wat die plaagdoder gaan spuit). Dit is nodig om ‘n mens self teen moontlike
spatsels, newels en mondelinge inname van plaagdoders en spuitmengsels te beskerm.
7. Kalibreer die spuittoerusting, sodat die regte dosering van die plaagdoder toegedien word.
Hierby ingesluit is die nagaan van spuitkoppe om seker te maak dit is nie verweer of verstop
nie. Spuitdruk moet ook korrek wees, terwyl die enjintoere van die trekker en die snelheid
waarteen die trekker beweeg, ook korrek moet wees.
8. Plaagdoders moet slegs aangewend word as die weersomstandighede gunstig is daarvoor.
As die suidooster opsteek of die Hoëveld se donderwolke wag om uit te bars of dit so warm is
dat alles bloot verdamp, is dit tyd om die plaagdoderaanwending vir eers te staak. Die wind
waai dalk net die plaagdodernewels na die buurman se aartappellande en dan is die gort
behoorlik gaar.
Vervolg op bl. 92