106 / 108
104
Beste Grootneef
d
ie winter is weer soos van ouds – met yskoue nagte
en spierwit ryp soggens oor die Vrystaat se vlaktes
gestrooi. Al die brommers en vlieë is na die gogga-
hiernamaals. Nóú kan ons bees slag!
Ou Neef, suinigheid is ‘n deug by enige goeie gade.
Soveel te meer waar meet en pas vir ‘n huishouding ‘n fyn kuns
geword het.
Die wik en weeg vir die volgende seisoen se mielieplantery is
egter ‘n perd van ‘n ander kleur. Met ‘n geskatte insetkoste van
R9 800/ha in ons wêreld en ‘n Julie’19 Safex-prys van R2 350,
beteken dit rofweg dat jy ten minste 4 t/ha moet stroop om gelyk
te breek. Met boerpryse na al die aftrekkings, raak die som nóg
moeiliker. Gegewe die gemiddelde opbrengs in ons omgewing,
is die gelykbreek wat ons moet realiseer ongemaklik naby
aan die risikolyn. Die besluit om in die nuwe seisoen te plant
of nie te plant nie, is soos ‘n klitsgras in jou kous. Jy is heeltyd
bewus van die ding, maar kry hom net nie uit nie.
Ou Neef, ek lees egter in die Volk se blad, hoe maklik
onse ministers oor groot geld praat. Enorme bedrae
word rondgestrooi asof dit ‘n hoop stronke agter
‘n dorsmasjien is wat net nie kan opraak nie. So
kondig die Minister van Vliegmasjiene aan dat ‘n
addisionele R5 miljard aan die SAL bewillig word,
sodat dié mank besigheid sy verpligtinge kan nakom.
En die Departement van Wetenskap en Tegnologie
se stuiwer in die armbeurs, was dat R2,2 miljard oor
die volgende drie jaar op die radioteleskoop-projek
noord van Sutherland uitgegee gaan word. Blykbaar
om die oerknal in die hemele op te spoor.
Buurman sê die goewerment mik te hoog. Want
niks van die miljarde rande aan vliegtuie of radio
teleskope, sal ‘n verskil aan aardbewoners se sa
ligheid maak nie. Wie op dees aarde wil in elk
geval ‘n lugdiens hê wat in die laaste dekade net
verliese losgevlieg het? Selfs die Springbokke
het onlangs verkies om met Ethiopian Airlines na
Washington te vlieg!
Ou Neef, wat nog te praat van oerknalle in die ruimte
soek? As hulle nou so ‘n knal gevang het, wat maak
ons met die ding? Dit sal nie ‘n jota of ‘n tittel verskil
maak aan enige huishouding wat raap en skraap om
te oorleef nie. Dalk sal ‘n oerknal ‘n paar wetenskap
likes se fisika-ego streel, maar is daar rand en sent-voordeel vir die
gewone aardbewoner uit die SKA-projek?
Buurman sê die goewerment moet aarde toe mik met hul
geldkanonne. Met die geld wat op vliegtuie en geluide uit die
ruimte “bewillig” word, kan die staat al die grondkwellings
oplos – titelaktes en al. Die Staat het vanjaar R10,425 miljard
vir grondhervorming geoormerk. Voeg nou hierby die SAL se
R5 miljard-meevaller en die ruimte-antennas se R2,2 miljard en
jy het so ‘n hoop geld bymekaar dat stoorgeld daarop betaal
moet word. Dan kan die goewerment grondhervorming afhandel
sonder om een hektaar sonder vergoeding te onteien.
Ou Neef, wat in die volgende ses maande in die Suidland op die
grond gaan gebeur, is vir ons aardbewoners van lewensbelang. ‘n
Oerknal ligjare weg in die verre verskiet, traak ons nie eintlik nie.
Groete op die Oosgrens! Skiet eerder amper mis as amper raak.
Kleinneef
e-posse
aan Groot neef
Die oerknal traak
ons nie eintlik nie
Lesers is welkom om ‘n e-pos na Kleinneef te stuur by
kleinneef@graingrowers.co.za.
Julie 2018