SA Grain October 2017

114 / 116

112
Beste Grootneefvan Langenhoven word vertel dat ‘n hoogop dame uit
die gemeenskap hom destyds aangevat het oor sy ón-
sobere gewoontes. Sy antwoord op die tirade was dat een
uur van sy dronkenskap meer werd was as die vrou se hele
salige lewe!
En van Winston Churchill word vertel dat ‘n vooraanstaande se
gade hom by ‘n funksie aangespreek het omdat hy so effe onvas op
sy voete was. Volgens oorlewering was sy antwoord in kort:
“Madam, tomorrow I will be sober, but you will still be fat !” Dalk het
hy haar dubbeld gesien, maar haar doppie was geklink.
Of soos die twee manne op die Kaapse vlak wat die papsak tot
die laaste droesem geledig het. Hul groeteboodskap aan al die
omstanders was: “Nou wag ons hom in.”
Daar word ook vertel van die ou wat al die leë bottels in sy huis
loop en stukkend gooi het met die verwyt dat hulle die oorsaak was
dat hy uit sy vrou, plaas en kinders is. Toe hy op ‘n vol bottel afkom,
het hy dit versigtig eenkant gesit met die woorde “Staan sountoe,
jy het nog niks met hierdie moeilikheid te doen nie!”
Ou Neef, deur die eeue was vuurwater die bron van kwaad. Die vet
in die vuur. Die klip in die kettie. Dit is ook deeglik in die volksmond
verpak: “Hy loop drie rye spore” of “Koos Wye Voete” vir die KWV.
En die jonger weergawe, “So getrek soos ‘n broekrek” – waarnemings
van mense in verskillende vlakke van besopenheid.
Buurman vertel nou nog van die nagmaal op
Vaalwater toe die wyn te min vir die kelkies en
die beker was. Die klomp jong diakens het toe
uit noodweer Oros en witblits gemeng tot ‘n edel
versnit. Tydens die diens het verskeie hande
opgegaan van gemeentelede wat gekla het dat
hul oorgeslaan is. In so ‘n mate dat die diens met
“Die Stem” afgesluit is.
Buurman vertel verder van die rugbytoer in sy oorle
jong dae. Dié was meer van ‘n kaas-en-wyntoer as
‘n rugbytoer, maar om die fokus te hou, is ‘n paar
wedstryde teen plaaslike dorpspanne gereël. Een
van die spanlede was Rooi Koos met ‘n rooi baard
soos uit die Anglo-Boereoorlog.
Een aand raak Rooi Koos so doenig met die kaas
en wyn – veral die wyn – dat hy later nie vriend
of vyand uitmekaar geken het nie. En toe rustig in
die hoekie van die kroeg ingesluimer het totdat ‘n
koma van ‘n slaap hom oorval het. Niks kon hom
roer nie. Sy spanmaats skeer toe in goeie gees sy
baard af en boek hom op die koop toe by die verkeerde hotel in.
Almal vrolik en bly die aand uiteen.
Die volgende oggend het Rooi Koos uit sy roesemoes ontwaak met
‘n monster van ‘n babelas. Boonop het hy hom in ‘n vreemde kamer
bevind wat glad nie met sy brein se vorige GPS-lesings geakkor-
deer het nie. Die badkamer en die kas se noord en suid was heel aan
die verkeerde kant. Met ‘n gesukkel het Rooi Koos die wasbak in
die badkamer opgespoor om sy gesig en rooi oë te lawe. Met die
opkyk in die spieël sien Rooi Koos die vreemde baardlose bakkies.
En skrik hom toe in ‘n ander bloedgroep in.
In die waas van soeke na homself en waar hy is, kom hy toe op die
sleutel van die hotel af waar hy aanvanklik ingeboek was. Met die
telefoon op die bedkassie bel hy die nommer op die sleutelhouer.
Toe die ontvangsdame aan die anderkant antwoord, vra hy mooi dat
sy asseblief tog in kamer nommer 10 moet gaan kyk of hy daar is.
En as hy nie daar is nie, is hy weg!
Toe hy uiteindelik by sy hotel van herkoms aanmeld, was die toer-
bus lankal vort, sy spanmaats besig om met hul kaas-en-wynlywe
teen die buurdorp se eerste span les op te sê. Sonder ‘n reserwe.
Ou Neef, hou maar matigheid voor oë, maar laat hy val waar hy wil.
Groete op die Oosgrens!
Kleinneef
E-POSSE
aan Groot neef
Dronkverdriet
Lesers is welkom om ‘n e-pos aan Kleinneef te stuur by .
Oktober 2017