40 / 44
Kontak Abrie Coetzee van Kamelia in Klerksdorp
by 018 468 5689 of 072 804 9841.
ABRIE COETZEE,
onthaal- en dekorspesialis
KUIER SAAM MET
Abrie
Desember 2015
38
Kom sit aan vir
‘n Kersfees-noenmaal
v
ir my is Kersfees die hoogtepunt van ‘n besige jaar. Ek dek
‘n lang tafel onder die welige koelte van die groot bome
in my tuin.
Die Kersfeestema is duidelik in my dekor te sien. Ek maak
gebruik van silwer en kristal, goud en Kersfeesrooi. Ons
Kerstafel is soos ‘n konsert. Dit is ‘n produksie van swier, gemoede-
likheid en geskenke. Dit is vonkelwyn en drama, skoonheid en grasie.
Ek gebruik linne met ‘n rooi Kersboom hier en daar, gesoom met kant
van Frankryk. Ook die servette lyk soos ‘n bruidsgewaad: Kant en lint
gewerk op die fyn linne met rooi Kersbome.
Elke gas kry ‘n kunstig toegedraaide geskenk in die mooiste papier
getooi met ‘n rooi, goue of silwer satynstrik. Party is met swart en
wit gestreepte papier toegedraai; ander weer met rooi kolle op wit.
‘n Paar het die rooi Kersboompie-motief op. Dit skep ‘n prentjie van
‘n Europese Kersfees en gaste wagtend op Kersvader.
Op ‘n aparte tafel, wat kreun met disse, is die tong en mosterd; asper-
sie-aspiek wat dril van lekkerte, wortel-en-kersie-aspiek, skaapboud
met ‘n kruisementsous en ‘n ham wat blink met glasering en kersies
– die vel in diamante gesny. Daar is groentes en slaaie met helder
kleure. Pienk waatlemoen, oranje spanspek, wit kaas en swart olywe
wat in ‘n slaaisous van lemmetjie en snaps verdrink. Geure wat die
tong prikkel.
Dan word alles afgedek en die kelners kom ingeloop soos soldate.
Heel voor dra die eerste een die massiewe brandewyn belaaide
marsepeinsneeu; ‘n egte wit versierde vrugtekoek. Rosette omkring
die lieflikheid. Ons monde water.
Dan volg die sjokolademousse, lemoenmeringuekoek, kaaskoek,
swartwoudkoek en vars room en vrugteslaai. Die ete duur die volle
Kersdag. As almal knuppeldik en moeg rondlê, glimlag ek behaaglik,
want ek weet almal is betower deur die atmosfeer, kos en geskenke.
Dan is ek tevrede.